السلام عليكم ..
اخباركم ؟ ان شاء الله تكونون بخير
نبدأ التدوينه مع مقوله تركيه احبها (( الحياة تعاملت معك بشكل جيد )) بالعاده اسمعها لو كبرت في السن وما ظهر فيها تجاعيد كثيره ..
بس فعلا السنه هذي كانت سعيده للكل ومنجزه في ناس كان حلمهم يكتبون كتاب ويتم اصداره و ناس كان حلمهم فتح ماركه وناس حلمهم يكون عندهم ١٠٠ الف متابع على اليوتيوب او حتى مليون وغيره من الاهداف إلي تحققت باستثناء اهدافي 😂 الي مفروض تكون ٢٠١٨ تم تحويلها إلى ٢٠١٩ اغلبها باستثناء المدونه وبعض الاهداف إلي ما كانت من ضمن خططي بس كانت سنه طويله مرت ١٠ سنوات خلال سنه لما امس اشوف احداث ٢٠١٨ انصدمت ان ياسر القحطاني اعتزل ٢٠١٨ !! كنت اعتقد انه في ٢٠١٧ ..

بس خلونا نتكلم عن الاشياء إلي حققتها في ٢٠١٨ بتكون ذكرى لي وممكن يكون الهام لكم :

١-اني توظفت في مركز تأهيل كانت خطوه كبيره بالنسبه لي لان فيه اختلاف واضح بين الواقع والدراسه وخاصه ان جيت في نص الترم فكان كل شئ حوسه ما قدرت افهم الاطفال واجهز لهم خطط تناسب شخصياتهم بس كان تعديل السلوك هو جوهر التجربه الفخر إلي حسيته بعد تعديل سلوك الاطفال كان كبير بالنسبه لي
٢- دوره بداية مشروع من المنزل كان شئ دخيل لانه كان خارج مخططاتي بس بعد ما فكرت قلت حلو اني استثمر في نفسي بس للاسف بعد الدوره بفتره تهكر الموقع و تم إلغائه . وايضا دوره الرسم كانت شئ فعلا غير مخطط له بس كان السعر مثالي لي فأخذتها وكانت مفيده بحط لكم رابط الدوره بس انصحكم تأخذون الدوره وقت التخفيضات ((الدوره باللغه الانجليزيه ))
٣- اللغه الانجليزيه موضوع لحاله يحتاج اتكلم فيه اكثر اذا حابين اكتب لكم عنه اكتبوا لي تحت لانه فعلا فعلا تطورت لغتي في ٢٠١٨ بشكل واضح
٤- اخذت دورات كثيره ، حاولت ابدأ مشاريع واجهز خطط لها وبكذا بديت السنه ٢٠١٨
٥- الرياضه اغلب السنه كنت امارسها و الاستغفار ما نسيت اتفاقنا بدايه السنه الي فاتت قولوا لي كيف انجزتوا ؟ هل كنتوا تسوون ٣٠ دقيقه رياضه !
٦- المدونة هي البطله الاساسيه هذي السنه كل الشهور تبنى كل خططها على المدونه وحققت نجاح كبير فشكرا لكم على زيارتكم المستمره للمدونة 💛 اذا عندكم اي اقتراحات للسنه هذي اكتبوها في التعليقات

خططي في ٢٠١٩ :

١ - في عام ٢٠١٩ مفكره استغني عن البلانر لانه حرفيا ما كان له فايده كنت اطبق اشياء خارج الخطط اليوميه بس في شهور افتخر اني التزمت لاني عندي مشكله في الالتزام
٢- افكر اقلل من مواضيع الفاشن لانه اخذت دوره ستايلست مره متحمسه اخلصها و اشاركم معلومات تفيدكم و احاول اقدم لكم استشارات رايكم ؟ انا حبيت الفكره وانتم ؟
٣- اللغه الانجليزيه واخذ دورات و ممكن اكمل ماجستير مع انه شئ مو اكيد
٤- ابغى افتح لي مشروع وقاعده اشتغل فيه بس ممكن يتحول الهدف ل٢٠٢٠ مع اني ما اتمنى هذا يصير
٥- افكر اهتم في صحتي وانصحكم بمثل هالخطوه يعني بقطع المشروبات الغازيه 💔 انا احبها مره انهيت السنه معها وودعتها 😭
٦- افكر نسوي مثل التحدي كل شهر مع بعض و الشئ هذا مقدر اسويه لحالي انتظر رايكم ؟
٧- بحاول انزل كل يوم رسمه طول السنه واشاركم فيها حتى لو كانت سيئه و نفس الشئ للتنسيقات بس بيكون للانستقرام تنسيق و للتويتر تنسيق بيكون عندكم خيارين لتنسيق نفس القطعه
٨-

تقريبا هذي كل اهدافي للسنه الجديده وبما اني الغيت البلانر حولت اهدافي لهنا علشان كل شوي أرجع لها واذا بتسألون وش بستخدم بستخدم اوراق TO DO عمليه بالنسبه لي وتكون قدام عيني واسهل ...

شكرا لزيارتكم اتمنى اقدم لكم دائم مواضيع مفيده 💛
شاركوني خططكم لسنه ٢٠١٩ 💛