السلام عليكم
اخباركم ؟ ان شاء الله تكونون بخير
من زمان ما كتبت تدوينه بس احس حياتي دخلت في بعض 😂 و كنت ابغى اجازه بعد يوم ميلادي و السنه الجديده و اجمع طاقه للسنه الجديده وكنت ابغى اسوي كل شئ بمنع نفسي عنه السنه الجايه وهذا بكتبه في التدوينه الجايه إن شاء الله بس بما اني قررت اليوم اكتب اهدافي و حبيت افيدكم علشان تكتبون اهداف جديده وتحققونها ..

اولاً : عصف ذهني

الطريقه هذي تستخدم في كل المجالات والهدف منها تطلعين افكار الطريقه سهله واساسيه بكتب لكم الطريقه إلي استخدمها ..

ارسمي دائره في النص ويطلع منها خطوط كل خط يعبر عن هدف تبغين تسوينه هاسنه مثلا انا كتبت في نص الدائره ٢٠١٩ و طلعت منها ٣ خطوط كل خط يمثل هدف اساسي او طريقتي في تقسيم حياتي في السنه الجديده
١- المدونه
٢- الشغل
٣- حياتي او باقي يومي
بعدها طلعت من كل من نقطه خطوط مثلا المدونه قسمتها لـقسمين
١- التواصل الاجتماعي
٢- موقع المدونه
بعدما قسمتها بديت افصل كل قسم مثلا التواصل الاجتماعي احدد البرامج إلي بستخدمها مثلا انستقرام وتويتر
ثم ابدأ بتفصيل الانستقرام وش انزل فيه ؟ اي وقت ؟ وش اكتب وهكذا اتمنى الفكره وضحت
احيانا تكون الافكار غير واقعيه بس مو مشكله طلعي كل الافكار الموجوده في عقلك وخليها قدامك على الورقه وبعدها حطيها في نقاط بسيطه يعني مثلا تقولين بسوين شركه كبيره لها سمعه مثلا زارا خلال سنه مثلا هو مو شئ مستحيل بس يحتاج وقت والوقت ممكن يكون اكثر من سنه فلو وصلتي نهايه السنه وما حققتي إلي تبغين بتحسين بإحباط و يمكن توقفين ويضع تعبك وحتى لو ما وقفتي بيجيك إحباط اتمنى الفكره وصلت

ثانياً : لوحة الالهام :

في وحده من الندوات للدكتور ابراهيم الفقي - رحمه الله - سمعت كلام بقول لكم المفهوم ان عقلك الباطن يصدق كل شئ تقولينه له عكس الواعي الصراحه ذكرني الكلام هذا بمثل ( يكذب الكذبه ويصدقها ) لو وقفتي قدام المرايه ولتي لنفسك كل يوم انا غنيه عقلك الواعي عارف انك كذابه بس الباطن بيبدأ يجهز لك استراتجيات كيف تصرين غنيه ويصدق
و على أساس هذا المنطق نبدأ بلوحه الالهام .
لوحه الالهام لها نوعين :
١- تكون فيها كتابات كثيره
٢- صور
اكثر من شخص تكلم عن فعالية الصور لانها تلقائيا بتروح لعقلك الباطن حتى لو ما كان لك خلق تقرين الصور تفسر نفسها كثر من الكلام من ضمن الاضافات إلي اضافتها يوتيوبر- هنا الرابط بتعطيكم نصائح اكثر عن Vision Board - لازم تضيفون مشاعر معها تعبر عن الصوره مثلا لو تبغين تأكلين اكل صحي اكتبي ليش مثلاً علشان احصل على جسم حلو و ابعد نفسي عن الامراض وهذا ذكرني بكلام ابراهيم الفق
ي - رحمه الله - ان المشاعره مهمه يعني مثلا لو اقول انا فاشله عقلك بيقول عديها مع مشاعر ثم تقولين انا فاشله بتثبت اكثر كفكره ومشاعر وهذا دايم يصير لنا ريحه عطر يذكرنا احيانا بموقف لانه تم تخزين المشار والموقف كذا طبعا انصحكم تشوفون مقاطعه لانها جدا مفيده

ثالثاً واخيراً : نصائح

نتيجه تجربتي السنه إلي فاتت حبيت اقدم لكم نصائح
١- بعد دورتي مع أ\ رنا الاحمدي قالت انه اي شئ تكتبينه على الورقه يتحق وفعلاً فيه اشياء تحققت صح مو كلها بس اهم شئ وإلي افكر في طول الوقت متحمسه اقوله لكم بس بكتبه إن شاء الله في التدوينه الجايه
٢- اهدافك الكبيره قسميها لاهداف صغيره ووزعيها على الاسبوع يعني مثلا لو بتسوين الشركه الاسبوع هذا بتجهزين خطتك والاسبوع إلي بعده تتواصلين مع شركائك وهكذا اتمنى انها وضحت الفكره

تقريباً هذي كل النصائح إلي بقدمها لكم اتمنى انكم تستفيدون
 شكرا لزيارتكم💛

11-12-2018

السلام عليكم
أخباركم ؟ ان شاء الله تكونون بخير
اليوم حابه اكتب هالتدوينه عن يوم ميلادي 24 مع ان ما عندي شئ بس حبيت اكتب عن عمري لان 23 كانت مرحله مليانه وابغى اتذكرها وافضل مكان لهذا هو المدونه لانها كانت اهم جزء في عمري 23 كنت اسعى اطورها اقضي الوقت ابحث واحاول القى مواضيع حلوه وكل شهر احاول اخليه احسن من قبله , اكثر شي احبه بيوم ميلادي هو وقته نهاية السنه الميلاديه في العاده اكتب اهداف لعمري الجاي اقدر اقول خاصه فيني عكس بداية السنه مع ان كل الاهداف تكمل بعض .
السنه هذي صارت اشياء كثيره مع اني كنت خايفه من عمر 23 , تقريبا كل ما شفت احد عمره 23 يكون مكتئب وطاقته غريبه فخفت من العمر وخاصه اني بديت العمر بمشاعر جدا جدا جدا سيئه ومواقف زفت فكنت اعتقد انه كذا بس كل شئ تغير بدايه 2018 اهدافه واشياء كثير متحمسه اكتبها لكم في تدوينه 2019 .....
بس الاهم والاجمل ان انا بدايه 23 مختلفه تماما عن 24 مدري هل هو نضج ولا تعلمت من الحياه اشياء كثير كنت اعتقد انها فوق طاقتي بس في الواقع كان لازم اعيشها علشان اعرف امكانياتي وقدراتي ..
ان كنت بتدخلين 23 هذا معناه حياة عمليه ما فيه دراسه ولا واجبات فيه استقلاليه.
استمتعوا بلحظات عمركم ولا تهتموا بالرقم هو مجرد حساب لمدة بقاءك في الحياه المهم هو كيف تستغلينه , ما ابغى اتكلم كثير وبعدين تخرب تدوينه 2019 قلت مترابطين جدا علشان كذا الفتره إلي بين يوم ميلادي وبدايه بخليه مثل الاجازه بدون خطط ولا شئ وباكل كل شئ بحرم نفسي منه السنه الجايه 😂 وبس سعيده اني شاركتكم التدوينه هذي

وحابه اشكر وسائل التواصل إلي احتفلت فيني 3 ايام😂 9 ديسمبر احتفلت فيني فيس بوك 10 ديسمبر احتفلت فيني جوجل , 11 ديسمبر احتفل فيني سناب  💛💛 ويقولون الغي وسائل التواصل الاجتماعي !!!!!!


 شكرا لزيارتكم شكرا لوجودكم في حياتي  💛